"Прывабны і сімпатычны". Хто хоча працаваць на КДБ Беларусі

30/04/2024 - 17:23

Ахвотнікаў хапае / @rubanau_collage

Больш за 30 зваротаў са злітай "Кіберпартызанамі" базы КДБ Беларусі прысвечаныя просьбам узяць на працу ў "чэкісты". Еўрарадыё вырашыла скласці "сацыяльны партрэт" ахвотнікаў трапіць у джэймсы бонды айчыннага разліву.

"Прывабны і сімпатычны"

18-гадовы Максім Ш. з Ніжняга Тагіла змясціў сваё жаданне працаваць на беларускі КДБ у тры абзацы. Піша: "Ніхто не вярбуе — бяру ініцыятыву ў свае рукі".

Максім ні на каго не даносіў, але вялізнага імпэту працаваць на спецслужбы ў гэткім юным узросце яму не займаць.

"Маю добрую фізічную і інтэлектуальную падрыхтоўку. Неразумна было б не сказаць — я прывабны і сімпатычны. Хачу працаваць і развівацца як агент міжнароднай выведкі".

Ну, што ж, поспеху Максіму зычыць не будзем.

"Мне патрэбныя грошы — прашу вас, дайце!"

А вось Аляксандр з Бараўлянаў пад Мінскам рэгулярна дзеліцца з беларускай спецслужбай рознага кшталту, як ён сам заўважае, тэхнічнымі "ноу-хау". Ён прэтэндуе на ролю персанажа другога плана з "Бандыяны" — вынаходніка М.

Зрэшты, беларускі М. ніколі не піша, пра якія менавіта яго распрацоўкі ідзе гаворка.

"Я нямала вам дасылаў розных сваіх навуковых ідэй, якія патрабуюць адно эксперыментальнай праверкі, і якія могуць быць вельмі карыснымі ў вашай дзейнасці, а таксама могуць забяспечыць вам пэўны від навукова-тэхналагічнай перавагі. Мне патрэбныя грошы — прашу вас, дайце!”

"Вывез усё золата, усе алмазы"

"Даўні сябар і партнёр Беларусі, карэнны масквіч Андрэй С. 1960 года нараджэння" таксама пажадаў далучыцца да КДБ РБ. Паводле яго слоў, ён быў экспертам-кансультантам Андропава, супрацоўнічаў з КДБ СССР, "дапамагаў Ельцыну ствараць СНД і Новую Расію".

"У 1991 годзе, у дні ГКЧП, на просьбу Герашчанкі [кіраўнік Дзяржбанка СССР. — Еўрарадыё], я проста вывез усё золата, усе алмазы і ўсю валюту з краіны, а калі путч быў завершаны, вярнуў усё назад на Радзіму", — піша Андрэй.

Акрамя таго, мужчына "быў звычайным экспертам ААН, СБ ААН, Генеральнага сакратара ААН, Рады Еўропы, прэзідэнта Расіі і вёў гэтую працу. З А.Р. Лукашэнкам". Праўда, з 42 гадоў Андрэй С. аднаўляўся пасля поўнай страты памяці. Кажа, "занадта шмат ведаў".

"Працую тэхнікам у дзяржаўнай навучальнай установе"

Нейкая Алена С. таксама звярнулася ў КДБ Беларусі з прапановай аб супрацоўніцтве. Жанчыне на той момант было 39 гадоў. У яе была вышэйшая філалагічная адукацыя і васьмігадовая дачка.

Алена С. зарабляе на жыццё, працуючы тэхнікам у дзяржаўнай навучальнай установе. Што ёю рухае? Чаго ёй не хапае ў жыцці? Відаць, супрацоўніцтва з КДБ…

"Добры дзень, я з Украіны"

А гэта яшчэ цікавей: вельмі хоча супрацоўнічаць з КДБ Беларусі Іна Х. з Украіны. Жанчына расказвае, што часта бывае за мяжой і можа свабодна прыязджаць у любую краіну ЕС. А таксама мае непасрэднае дачыненне да валанцёрскіх арганізацый, якія аказваюць дапамогу воінскім часцям у зоне АТА.

Верагодна, запыт быў адпраўлены яшчэ да поўнамаштабнага ўварвання Расіі ва Украіну.

"У мяне мара працаваць на КДБ"

Фуркат Ж. прыехаў у Беларусь з Узбекістана з двума сынамі і жонкай. Скончыў маскоўскі МІДіМК, магістр.

"У мяне мара працаваць на КДБ. Калі ёсць магчымасць дапамажыце, калі ласка, дзякуй!"

"Спецыяльна ездзіў па месцах, дзе стаяць базы NATO"

Аляксей У. доўгі час жыў у Балгарыі. У КДБ накіраваў ліст з тэкстам пра тое, што мае флэшку, "дзе [ёсць] усе аб'екты, пачынаючы ад палаца "незалежнасці", заканчваючы дзіцячымі садамі і школамі".

У Балгарыі мужчына займаўся відэаблогам, расказвае, што падчас беларускіх пратэстаў спецыяльна ездзіў па тых месцах, дзе стаяць базы NATO.

Супрацоўнікам ФСБ Аляксей У. інфармацыю вырашыў не аддаваць, чамусьці спаслаўшыся на іх маладосць і недасведчанасць. Толькі КДБ Беларусі, толькі хардкор!